檢查失敗

話說細細心漏症醫生提議每年照心臟一次, 但由於細細性格緊張, 第一次照時已反抗, 再加上一向就醫診所唔係心臟專科, 所以要去另一間診所, 唉~ 老實講 ..... 專科診所姑娘真係手忙腳亂呢! 

但不可再拖, 已經係兩年前照過, 所以上月中約好醫生

細細不停叫, 十分驚驚~ ~ 

從貓箱出O黎 都好難, 姑娘們又係好緊張 ..... 係 => 姑娘們, 因為有2女1男, 再加埋醫生, 家姐同我, 足足6個人圍住隻貓

最初還可以比醫生作初步檢查, 當要打麻醉針時, 有個姑娘想用布蓋住細細個頭 ..... 我家姐即刻阻止!!!! 

之後大家你一言我一語, 我覺得好嘈, 心知不妙, 3位姑娘有2位要禁住細細, 另外男姑娘就不斷係細細面前叫佢, 以為咁可以引細細注意力...超級白痴!!! 

最終細細咬我家姐隻手 => 走貓

另外一個姑娘準備戴手套, 叫我同家姐出房一陣, 話佢地會麻醉細細

我同家姐唯有出房, 因為已經做左一半, 希望真係可以照到細細心臟

過左幾分鐘, 醫生同1位姑娘見我同家姐, 話細細太緊張, 不適宜麻醉

吓 ~ ! 

我同家姐都無奈, 唯有話再約時間, 不過 .......

其實一背住醫生同姑娘, 我地都話唔好再照啦!!! 

我叫家姐等接細細, 我行去隔離街診所, 想同梁醫生( 係勝利道我家6貓BB到現在一直睇開個女醫生) 講細細情況, 不過梁醫生當日放假, 我就同姑娘講詳情, 再叫梁醫生有時間打電話比我

家姐隻手比 細細咬到流血腫晒


 

不過我地最心痛係細細, 佢驚到返屋企又叫又厘, 因為之前一晚十點後要禁飲食準備麻醉, 但返到屋企比佢都唔敢食呀! 

我都同家姐講, 算啦....唔係心漏症死, 係嚇死~ 

而家家姐都怕細細會有心理陰影, 會影響梁醫生幫佢打預防針, 因為細妹就係曾經比個替工醫生嚇親, 之後就唔再比醫生摸又咬人, 後來3年都打唔到預防針, 好彩梁醫生想到入洗衣袋咋~ 

 

細妹就係咁樣隔住個袋打針啦