去到針灸問醫師, 佢話隻貓已經有新主人, 所以唔需要擔心
隻貓真係又靚仔又乖, 5歲已絕育, 好親人添~
其實醫師好錫隻貓, 之前曾經搬舖都帶埋隻貓，但今次唔會再開新舖，無奈屋企有隻狗, 隻狗又寵壞左好霸道, 一定對隻貓有危險, 所以唯有搵新主人, 咁傾開醫師知我有養貓又識義工, 大家就邊針灸邊講貓經啦
如是者過左三星期多........
某日下午醫師打電話比我問有無人要貓, 原來新主人會將隻貓放係茶餐廳捉老鼠, 其實醫師間舖係樓上住宅, 隻貓係室內家貓, 所以怕舖頭環境難適應, 而且更怕食物各方面都差, 於是希望我問下義工
我即刻比相問義工同貓友, 朋友立即廣傳, 義工亦答應可以收貓暫托搵人領養
由於醫師未需要即時結業, 所以貓依然留係舖頭等人睇, 過左幾日義工已經約人去睇貓, 領養者自己有1隻貓, 睇貓過程十分順利, 貓表現好乖又親人, 睇貓成功被領養!!
唉 !~~!~~
過左幾日義工收到電話話隻貓好惡, 見到另1隻貓就發癲, 相信因為佢未同其他貓相處過, 所以決定退貓
義工接貓後我即刻去探佢
義工屋企有多隻貓暫托, 所以佢好驚!!
困籠第三日至肯食, 真可憐豬~
我地將佢改名為 " 大眼 "
再努力廣傳, 不過今次希望係只養1隻貓為首選
大眼真好彩, 過左一星期, 有人上義工屋企睇細貓, 見到有幾隻細貓好得意, 點知細貓對人又咬又fe, 反而見到大眼好靜, 望下佢即刻嗲叫, 於是領養者立即心軟, 領養者有養貓經驗, 暫時只想養1隻, 咁就十分之好....
而家大眼去左新家庭已經兩星期, 一切都適應中, 義工將新家庭地址比左我, 如果有時間可以去探貓
我覺得都係緣份，我又會隻手受傷所以去醫館至遇到大眼，佢需要新家庭時候，如果去茶餐廳我怕佢生活不好，所以我四處聯絡貓友，又好彩義工朋友幫助，老實講我自己一定唔敢答應醫師，因為屋企人極度反對暫托，但我心裡一想到大眼就不安，所以上個月因隻手同大眼都好煩～
希望大眼新生活開心, 以後幸福!!!
