石生花(屁屁)

 去年10月去花墟睇花買泥無意中見到佢......

覺得好可愛, 細細盆只需$20, 老闆娘話要控水, 可以一個月都唔需要比水

我心想水係生命之源, 唔比水如何生存呢?!!!

於是係盆底比水吸得好快, 隔一星期又比小小, 之後長高好多呀.....

 

上網搵下資料, 見到原來有多種顏色仲有花開

 
 但再過1個月發現有幾粒唔見左, 疏落哂呀~

 

問網上種植群組, 佢地話係化水, 我比得多水, 叫我即刻重新種過, 起出來好似牙齒咁, 真係毛管棟, 要涼乾3日再落泥....

網友叫我唔好種得太迫, 要有空間疏氣, 所以我分左2盆仔

而家只係2-3星期噴小小水係表面, 網友話保持原本狀態已經係成功一半

見網友話花墟仲有其他色, 但因疫情怕人多, 我一直都無再去

近日應該係年花時間, 相信更加多人, 所以唯有忍到過年後再諗

不要2020期待2021

今年全球都係疫症下十分艱難

我個人係好小心抗疫, 因為家有老喵, 所以朋友唔會約, 再加上11月開始第四波疫情嚴重, 已經2個月無見家姐

聖誕節亦都一樣, 我只係基本去買人同喵糧, 日用品 ..... 一切都係屋企附近, 其餘時間都留家陪喵度過

 

 

過幾日就係2021年來臨, 相信大家希望疫苗成功, 可以快快過正常生活, 唔再擔心中招, 而家傷風感冒真係好驚

 

 

今個元旦將會好凍, 市區只有8-9度, 所以大家都要小心保暖, 以免一病又要去做檢測, 大家要健健康康迎接新一年 ~ !